ಒಬ್ಬ ವ್ಯಕ್ತಿಯ ಒಂದು ದೇಗುಲದ ಒಂದು ವಿದ್ಯಾಸಂಸ್ಥೆ…ಅಥವಾ ಒಂದು ಸಂಘ-ಸಂಸ್ಥೆಯ ಬದುಕಿನಲ್ಲಿ ಐದು,ಹತ್ತು,ಇಪ್ಪತ್ತೈದು,ಐವತ್ತು,ಅರುವತ್ತು,ಎಪ್ಪತ್ತೈದು ,ನೂರು ವರುಷಗಳು ಮಹತ್ವ ಸ್ಥಾನ ಪಡೆಯುತ್ತವೆ.
ದಕ ಜಿಲ್ಲೆಯ ಪುತ್ತೂರು ತಾಲೂಕಿನ ಬೋರ್ಡ್ ಹೈಸ್ಕೂಲು,ಸರಕಾರಿ ಪದವಿಪೂರ್ವ ಕಾಲೇಜು ಪ್ರೌಢಶಾಲಾ ವಿಭಾಗಕ್ಕೀಗ ನೂರ ಐದು ವರುಷಗಳ ಸಂಭ್ರಮ.1916ರಲ್ಲಿ ಸ್ಥಾಪನೆಗೊಂಡ ಈ ವಿದ್ಯಾದೇಗುಲ ದಕ್ಷಿಣ ಕನ್ನಡ ಜಿಲ್ಲೆಯ ಪ್ರಾಚೀನ ಸರಕಾರಿ ಸಂಸ್ಥೆಗಳಲ್ಲಿ ಅತ್ಯಂತ ಪುರಾತನ,ಅತ್ಯಂತ ಹೆಚ್ಚು ವಿದ್ಯಾರ್ಥಿಗಳನ್ನು ಹೊಂದಿರುವ,ಲಕ್ಷಾಂತರ ಹಿರಿಯವಿದ್ಯಾರ್ಥಿಗಳಿಗೆ ವಿದ್ಯಾದಾನ ಮಾಡಿ ಅವರೆಲ್ಲ ದೇಶ-ವಿದೇಶಗಳಲ್ಲಿ ನಾನಾ ಉದ್ಯೋಗಗಳ ಹೊಂದಿ ಬದುಕು ಕಟ್ಟಿಕೊಳ್ಳಲು ಕಾರಣವಾದ ಮಾತೃಸಂಸ್ಥೆಯೆನಿಸಿಕೊಂಡಿದೆ.
ಹಿರಿಯ ಕ್ರಿಯಾಶೀಲ ಮುಖ್ಯಸ್ಥರನ್ನು ಗುರುವೃಂದವನ್ನು ಹೊಂದಿರುವ ಈ ವಿದ್ಯಾದೇಗುಲ ಸರಕಾರದ ಆಡಳಿತ ವ್ಯವಸ್ಥೆಯಲ್ಲಿ ಇಂದೂ ಮುಂಚೂಣಿಯಲ್ಲಿದೆ.ಇಂದೂ ಅನೇಕ ಪ್ರತಿಭಾವಂತ ಶಿಕ್ಷಕರ ಶಾಲಾಭಿವೃದ್ಧಿ ಸಮಿತಿಯ ಸಹಕಾರ-ಸೇವೆಯೊಂದಿಗೆ ಶಿಕ್ಷಣ,ಕಲೆ-ಸಾಹಿತ್ಯ,ಕ್ರೀಡೆ,ಸಾಂಸ್ಕೃತಿಕ,ಎನ್.ಸಿ.ಸಿ, ವಿಜ್ಞಾನ ಪರಿಸರ ,ಗ್ರಾಹಕ ಕ್ಲಬ್ ..ಹೀಗೆ ವಿವಿಧ ಚಟುವಟಿಕೆಗಳಿಂದ ಫಲಿತಾಂಶದಲ್ಲೂ ಎಂದೂ ಹಿಂದೆ ಬಿದ್ದಿಲ್ಲ.
ಮಹತೋಭಾರ ಶ್ರೀ ಮಹಾಲಿಂಗೇಶ್ವರ ಸರ್ವಾದರಣೀಯ ದೇವ.ಆತನ ಸಾನಿಧ್ಯದಲ್ಲಿ ಕೊಂಬೆಟ್ಟು ಗಿರಿಯಲ್ಲಿ ರಾರಾಜಿಸುತ್ತಿರುವ ಈ ವಿದ್ಯಾದೇಗುಲ ತನ್ನ ಸಾಧನೆ ಮಹತ್ವಗಳೊಂದಿಗೆ ಪಾರಂಪಾರಿಕ ತಾಣವೆಂಬ ಹಿರಿಮೆಗೆ ಪಾತ್ರವಾಗಿದೆ.
ಪುರಾತನ ಅನೇಕ ಹಿರಿಮೆಗಳಿಗೆ ಕಾರಣವಾದ ಈ ವಿದ್ಯಾದೇಗುಲ ಶಿಥಿಲಾವಸ್ಥೆಗೊಳಗಾಗಿರುವುದು ಮಕ್ಕಳ ಹಿತದೃಷ್ಠಿಯಿಂದ ಆತಂಕದ ವಿಷಯವಾಗಿದೆ.ದೇವಾಲಯಗಳನ್ನಾದರೆ ಜೀರ್ಣೋದ್ಧಾರಗೊಳಿಸಿ ಪ್ರತಿಷ್ಠಾಷ್ಟಬಂಧ ಬ್ರಹ್ಮಕಲಶ ಜಾತ್ರೋತ್ಸವ ಮಾಡುವುದ ಕಂಡಿದ್ದೇವೆ.ಅದೇ ರೀತಿಯಲ್ಲಿ ಈ ವಿದ್ಯಾದೇಗುಲಕ್ಕೂ ಪುನರುತ್ಥಾನ ಕಾಯಕಲ್ಪ ಆಗಲೇಬೇಕಾಗಿದೆ.
ಆದರೆ ಯಾರಿಂದ…ಯಾವಾಗ…ಇಂಥ ಪ್ರಶ್ನೆಗಳಿಗೆ ಉತ್ತರವಾದವರು ಈ ವಿದ್ಯಾಸಂಸ್ಥೆಯ ಹಿರಿಯವಿದ್ಯಾರ್ಥಿಗಳಾಗಿ ಸಮಾಜದ ನಾನಾ ಕ್ಷೇತ್ರಗಳಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡವರು…ದೇಶ-ವಿದೇಶಗಳಲ್ಲಿರುವ ಹಿರಿಯವಿದ್ಯಾರ್ಥಿಗಳು ಶಾಲಾ ಮುಖ್ಯಸ್ಥರ ಅಧ್ಯಾಪಕ ವೃಂದ ಶಾಲಾಭಿವೃದ್ಧಿ ಸಮಿತಿ ಮೊದಲಾದವರ ಧ್ವನಿಗೆ ಪ್ರತಿಧ್ವನಿಯಾಗಿ ಸ್ಪಂದಿಸಿ ಇಂಥ ಕಠಿಣ ಸಂದರ್ಭದಲ್ಲಿ ತಮ್ಮ ಬದುಕಿಗೆ ಕಾರಣವಾದ ವಿದ್ಯಾದೇಗುಲದ ಕಡೆ ಮುಖ ಮಾಡಿ ಇಂದು ನಮ್ಮ ನಡಿಗೆ ನಮ್ಮ ಶಾಲೆಯ ಕಡೆಗೆ ದೇಶವಿದೇಶಗಳಿಂದ ಬಂದು ತಮ್ಮ ಅಭಿಮಾನದ ವಿದ್ಯಾದೇಗುಲದ ಪುನರುತ್ಥಾನದ ಕಾಯಕದಲ್ಲಿ ಜೊತೆಯಾಗಿರುವುದು ಒಂದು ಯೋಗಾಯೋಗ.
ಸಾಪ್ತಾಹಿಕ ಕರಸೇವೆಯಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡು ಶಿಥಿಲಗೊಂಡಿರುವ ರೀಪು,ಪಕಾಸು,ಹಂಚುಗಳನ್ನು ಗಟ್ಟಿಗೊಳಿಸಿ ಹಿಂದಿನ ರೂಪಕ್ಕೆ ತರುವ ಕಾರ್ಯ ಸಮರೋಪಾದಿಯಲ್ಲಿ ನಡೆಯುತ್ತಿರುವುದ ಕಂಡು ಮೂಕವಿಸ್ಮಿತನಾದೆ.ಎಲ್ಲರ ನಡೆ ಶಾಲೆಯ ಕಡೆ ಹೆಜ್ಜೆ ಹಾಕುತ್ತಿವೆ.ನಾವು ಕಲಿಸುವಾಗ ಇದ್ದ ಎಳೆಯ ವಿದ್ಯಾರ್ಥಿ-ವಿದ್ಯಾರ್ಥಿನಿಯರು ತಮ್ಮ ಬಾಳಬೆಳಗಿದ ವಿದ್ಯಾಸಂಸ್ಥೆಯನ್ನೆಂದೂ ಮರೆಯಲಾರರು ಎಂಬುದಕ್ಕೆ ಇಲ್ಲಿನ ಹಿರಿಯ ವಿದ್ಯಾರ್ಥಿಗಳ ಕ್ರಿಯಾಶೀಲ ನಡೆಯೇ ಕಾರಣ.
ತನು ಮನದ ಸಹಕಾರದೊಂದಿಗೆ ಅನೇಕ ಸಮಾಜದ ಗಣ್ಯರೂ ಮೆಚ್ಚಿ ಬರುತ್ತಿರುವುದು ಶಿಕ್ಷಣದ ಸಂಸ್ಥೆಯ ಮಹತ್ವವೇನೆಂಬುದರ ದ್ಯೋತಕವಾಗಿದೆ.ತುರ್ತು ಕಾಮಗಾರಿಗೆ ನಮ್ಮ ಆಡಳಿತ ವ್ಯವಸ್ಥೆ ಸರಕಾರಗಳೂ ಮುಂದಾಗುತ್ತವೆ ಎಂಬ ನಂಬಿಕೆ ನಮ್ಮೆಲ್ಲರದು.ಹನಿ ಹನಿ ಜೇನ ಹನಿಯಾಗುವಂತೆ ಎಲ್ಲಾ ಸೇರಿದಾಗ ದೊಡ್ಡ ಕಡಲೇ ಆಗಬಹುದು.ಮತ್ತೆ ನಾವು-ನೀವು ಈ ಹಿರಿಯ ವಿದ್ಯಾದೇಗುಲ ಸರ್ವಾಂಗ ಸುಂದರವಾಗಿ ಕಂಗೊಳಿಸಿ ಎಲ್ಲರ ಮನದುಂಬಲಿ ಎಂದು ಶುಭ ಹಾರೈಸೋಣ.
ಬರಹ: ನಾರಾಯಣ ರೈ ಕುಕ್ಕುವಳ್ಳಿ. ನಿವೃತ್ತ ಶಿಕ್ಷಕ.
